Колинас комо елефантес бланка
From LFN
Пар Ернест Хемингуаи 1927
Традуида пар Даниел Алегретт 1999
Ла колинас тра ла вале де ла Ебро ес лонга е бланка. Еста парте аве но омбра е но арборес, е ла стасион ес ентра ду линиас де феровиа су ла сол. Просима контра ун ладо де ла стасион, ес ла омбра тепида де ла конструида е ун кортина, фа де кордас де гранос де бамбу, пенденте тра ла порта абрида а ла бевериа, пер мантени ла москас а естра. Ла американ е ла фиа ке ел акомпаниа, сента се а ун табле су ла омбра, естра ла конструида. Ес мулте калда, е ла трен рапида да Барселона ва вени ен куатродес минутос. Ел ва пара се ен еста стасион ентра ду минутос е донке ва парти а Мадрид.
"Ке нос бевира?", ла фиа деманда. Ел ретира се шапо е поне ел супра ла табле.
"Ес мулте калда," ла ом дисе.
"Нос ва беви бир."
"Dos cervezas", ла ом дисе а ла кортина.
"Grandes?" ун фема деманда да ла порта.
"Si, dos grandes."
Ла фема порта ду витрос де бир е ду портавитрос. Ел поне ла портавитрос е ла витрос де бир супра ла табле е ел регарда ла ом е ла фиа. Ла фиа регарда ла линиа де колинас. Лос ес бланка су ла сол, е ла кампаниа ес брун е сека.
"Лос паре елефантес бланка," ел дисе.
"Ме виде ун но темпо," ла ом беви се бир.
"Но, ту но поте."
"Ме поте," ла ом дисе. "Сола пер ке ту дисе ке ме но поте, еса но проба алга коса."
Ла фиа виде а ла кортина. "Лос пинта ел алга," ел дисе. "Ке ел дисе?".
"Anís del Toro. Ел ес ун бевида."
"Нос поте тента ел?"
Ла ом клама "Ескута" тра ла кортина. Ла фема вени да ла бевериа.
"Куатро реалес."
"Нос десира ду Anís del Toro."
"Кон акуа?"
"Ту десира ел кон акуа?"
"Ме но сабе," ла фиа дисе. "Ел ес бон кон акуа?"
"Ел ес но мал."
"Вос десира лос кон акуа?", деманда ла фема.
"Си, кон акуа."
"Ел густа комо ликорис," ла фиа дисе е поне ла витро супра ла табле.
"Еса ес ла модо пер тота ла косас."
"Си," дисе ла фиа. "Тота ла косас густа комо ликорис. Спесиал тота ла косас ке ту ес есперанте мулте темпо, комо асинте."
"Аи, силенти."
"Ту коменса ел," ла фиа дисе. "Ме диверте ме. Ме аве ун бон темпо."
"Бон, нос ва тента аве ун бон темпо."
"Мулте бон. Ме тента. Ме дисе ке ла монтаниас паре елефантес бланка. Ме ес брилианте, но?"
"Ту ес брилианте."
"Ме воле тента еста бевида нова. Еса ес тота ке нос фа, но? Регарда а косас е тента бевидас нова?"
"Ме имажина."
Ла фиа регарда а тра ла колинас.
"Лос ес колинас бела," ел дисе. "Лос но паре вера елефантес бланка. Ме воле синиа сола ла колорес де лос пелес тра ла арборес."
"Нос ва аве отра бевидас?"
"Мулте бон."
Ла вента тепида софла ла кортина контра ла табле.
"Ла бир ес бон е фреска," ла ом дисе.
"Ел ес амабле," ла фиа дисе.
"Ел ес серта ун сируржиа симпле, Жиг," дисе ла ом. "Ел но ес вера ун сируржиа а но куанто."
Ла фиа регарда ла соло супра ке ла табле реста.
"Ме сабе ке ту но ва детестара ел, Жиг. Ел ес вера но мулте. Ел ва пермите сола ке ла аира ентра."
Ла фиа дисе но коса.
"Ме ва ваде кон ту е ме ва ста кон ту ла темпо тота. Лос сола ва пермите ке ла аира ваде а ентра е да ла ора тота ес перфета натурал."
"Е ке нос ва фа пос ла ора?"
"Нос ва ес бон пос ла ора. Куаси комо нос ес анте еста ора."
"Пер ке ту пенса еса?"
"Еса ес ла сола коса ке аноиа нос. Ел ес ла сола коса ке фа нос нонфелис."
Ла фиа регарда а ла кортина, ретира се мано е пренде ду кордас де ла кортина.
"Е ту пенса ке нос ва ес а ла ора бон е фелис."
"Ме сабе ке нос ва ес. Ту но дебе теме. Ме коносе мулте персонес ке иа фа еса."
"Ме анке," ла фиа дисе. "Е пос ла ора, лос тота ес мулте фелис."
"Бон," ла ом дисе, "си ту но воле, ту но дебе фа еса. Ме но ва облига ту си ту но десира фа еса. Ма ме сабе ке ел ес мулте симпле."
"Е ту воле вера еса?"
"Ме пенса ке ел ес ла плу бон коса пер нос фа. Ма ме но воле ке ту фа еса си ту но десира вера."
"Е си ме фа еса, ту ва ес фелис е ла косас ва ес комо лос иа ес е ту ва ама ме?"
"Ме ама ту еста ора. Ту сабе ке ме ама ту."
"Ме сабе. Ма си ме фа еса, донке ва ес анке ора бон си ме дисе ке косас ес комо елефантес бланка, е ту ва густа ел?"
"Ме ва ама ел. Ме ама ел еста ора, ма ме но поте пенса де ел. Ту сабе комо ме ес куандо ме ес дистурбада."
"Си ме фа еса, ту но ва ес отра вес дистурбада?"
"Ме но ва ес дистурбада де еса пер ке ел ес мулте симпле."
"Донке ме ва фа еса, пер ке ме но консерна де ме."
"Ке ту синиа?"
"Ме но консерна де ме."
"Бон, ма ме консерна де ту."
"Си, си. Ма ме но консерна де ме. Е ме ва фа еса е а ла ора тота ва ес бон."
"Ме но воле ке ту фа еса си ту сенсе еста модо."
Ла фиа ста е пасеа а ла естремиа де ла стасион. Тра, а ла отра ладо, аве кампос де гранос е арборес лонго ла ривас де ла Ебро. А дистанте, тра ла рио, ес монтаниас. Ла омбра де ун нубе мове се тра ла кампо де грано е ла фиа виде ла рио тра ла арборес.
"Е нос ва поте аве тота еста," ел дисе. "Е нос ва поте аве тота коса е када диа нос фа ле плу нонпосабле."
"Ке ту дисе?"
"Ме дисе ке нос ва поте аве тота косас."
"Нос поте аве тота косас."
"Но, нос но поте."
"Нос поте аве ла мундо ентиер."
"Но, нос но поте."
"Нос поте ва а тота парте."
"Но, нос но поте. Ел но ес де нос плу да еста ора."
"Ел ес де нос."
"Но, ел но ес. Е куандо лос ва пренде ел, ту но ва аве ле анке ора а но темпо."
"Ма лос но пренде ел."
"Нос ва еспера е виде."
"Вени а ла омбра," ла ом дисе. "Ту но дебе сенсе еста модо."
"Ме но сенсе алга модо," ла фиа дисе. "Ме сола сабе косас."
"Ме но десира ке ту фа алга коса ке ту но воле фа…"
"… Е ке но ес бона пер ме," дисе ла фиа. "Ме сабе. Нос поте аве ун отра бир?"
"Мулте бон, ма ту дебе виде…"
"Ме виде," ла фиа дисе. "Нос поте силенти?"
Лос сента се а ла табле е ла фиа регарда а ла колинас ен ла ладо сека де ла вале, е ла ом регарда ла фиа е а ла табле.
"Ту дебе виде," ла ом дисе, "ке ме но десира ке ту фа еса си ту но десира. Ме ес перфета воленте ке ту континуа ел си ел синиа алга коса а ту."
"Ел но синиа алга а те? Нос ва поте ва бон."
"Натурал ел синиа алга. Ма ме но десира алга ун ма ту. Ме но десира ун отра. Е ме сабе ке ес мулте симпле."
"Си, ту сабе ке ес мулте симпле."
"Ес бон ке ту дисе еста, ма ме вера сабе ел."
"Ту поте фа алга коса пер ме еста ора?"
"Ме ва фа тота коса пер ту."
"Ту поте пер фаворе пер фаворе пер фаворе пер фаворе пер фаворе пер фаворе силенти е но парла?"
Ла ом дисе но коса ма регарда ла багаже апоиада а ла муро де ла стасион. Аве селос адерида де тота ла отелес до лос паса се нотес.
"Ма ме но воле ке ту фа еса," ла ом дисе, "Ме но консерна де ел."
"Ме ва криа!" ла фиа дисе.
Ла фема вени тра ла кортинас кон ду витрос де бир е поне лос супра ла портавитрос умида. "Ла трен ва вени пос синко минутос," ел дисе.
"Ке ел дисе?" ла фиа деманда.
"Ке ла трен ва вени пос синко минутос."
Ла фиа сурие фелис а ла фема, пер грасиа ел.
"Ме плу бон ва порта ла сакос а ла отра ладо де ла стасион," ла ом дисе. Ла фиа сурие а ел.
"Мулте бон. А ла ора вени е нос ва фини беви ла бирес."
Ла ом пренде ла ду сакос песа е порта лос тра ла стасион а ла отра феровиас. Ел регарда ла феровиас ма ел но поте виде ла трен. Куандо ел вени анке ора, ел пасеа тра ла бевериа, до ла персонес ке еспера ла трен беви. Ел беви ун Anís ен ла бевериа е регарда а ла женте. Лос ва еспе разонанте ла трен. Ел ва ваде да ла бевериа тра ла кортина. Ла фиа сента се а ла табле, е сурие а ла ом.
"Ту сенсе плу бон?", ла ом деманда.
"Ме сенсе бон," ла фиа дисе. "Ес но коса мал. Ме сенсе мулте бон."
Ернест Хемингуаи, "Hills Like White Elephants". Copyright 1927, Харлес Скрибнер'с Сонс.
