Alfabeta orijinal

From LFN

La alfabeta orijinal es developeda par un popla semetica ce abita en o prosima a Egipte, posable en la deserto Sinai.⁽¹⁾ Los funda el a la idea developeda par la Egiptanes, ma ia usa se simboles propre. La alfabeta ia es adotada par se visina e relatas a la este e norde, la Cananites, la Ivris, e la Fenesianes. La Fenesianes porta se alfabeta a otra poplas de Asia sude-ueste e a la Arabianes, Elinicas, e Etruscanes, e a la area de Espania moderne. La leteras e nomes a la sinistra su es los ci la Fenesianes usada. Recorda ce la leteras ia es reversada, per ce la Fenesianes ia scrive de sinistra a destra. Alga ves, leteras es versada a se lado.

Vide ance la Evolui de alfabetas.

---

	'alef, la bove, ia comensa como un desinia de la testa de un bove. El sinifia un sona esplodente glotal ante un vocales. La Elinicas, ci ia nesesa simboles vocale, ia usa el per alfa (A). La Romanes ance ia usa el per A.
	Beth, la casa, posable ia es derivada de un simbol Egiptan plu retangula, de un abita fa de canas, ma la sona de acel simbol ia es como h. La Elinicas ia clamada el beta (B). La Romanes ance ia usa el per B.
	Gimel, la camel, posable ia es orijinal la desinia de un baton per lansa, como un bumerang. La Elinica ia clamada el gama (Γ). La Etruscanes - ci no ia ave un sona g - ia usa el per se sona c, e ia dona el a la Romanes per C. La Romanes ia junta un bara corte per cambia el a G.
	Daleth, la porta, posable ia es un pex. La Elinicas ia cambia el a delta (Δ) e ia dona el a la Romanes per D.
	He posable ia sinifia fenestra, ma ia representa orijinal un om de la fronte, con brasos a alta, clamanta o predante. La Elinicas ia usa el per la vocale epsilon ("E simple"). La Romanes ia usa el per E ance.
	Waw, la onca, posable ia representa un maza. La Elinicas ia usa un varia ce ia es simila a nos F, ce los clamada digama, per la numero ses. Esta ia es usada par la Etruscanes per V, e los ia dona el a la Romanes per F. La Elinicas ia ave un varia du - upsilon (Υ) - ce los move a la fini de se alfabeta. La Romanes usa un varia de upsilon per V, ce plu tarde es scriveda ance como U, e adota la forma Elinica per Y. En la sentenio sete, la popla Engles ia crea la W, o "duple U."
	Zayin posable ia sinifia un spada o otra arma. La Elinicas ia usa el per zeta (Z). La Romanes ia adota el plu tarde per Z, e pone el a la fini de se alfabeta.
	H.eth, la ensirca, ia es un consonente de "garga profunda" (farinjal). La Elinicas ia usa el per la vocale eta (H), ma la Romanes ia usa el per H.
	Teth posable representa orijinal un fuso. La Elinicas ia usa el per theta (Θ), ma la Romanes, ci no ia ave la sona de th, ia lasa el cada.
	Yodh, la mano, ia comensa como un desinia de la brase completa. La Elinicas ia usa un varia simple de el per iota (I). La Romanes ia usa el per I, e plu tarde ia junta un varia per J.
	Kaf, la caveta de la mano, es adotada par la Elinicas per kappa (K), e ia dona el a la Romanes per K.
	Lamedh ia comensa como un desinia de un baton per la pastor de boves. La Elinicas ia usa el per lambda (Λ). La Romanes ia versa el a L.
	Mem, la acua, ia deveni la Elinica mu (M). La Romanes ance ia usa el como M.
	Nun, la pex, ia es orijinal un serpente o un angila. La Elinica usa el per nu (N)), e la Romanes usa el ance per N.
	Samekh, ce ance ia sinifia pex, es de un orijin nonconoseda. El posable ia representa un posteta per tendas, o un forma de suporta. El pare simile a un djed Egiptan, trova a multe scultas sante. La Elinicas ia usa el per xi (Ξ) e un varia simile per chi (X). La Romanes ia garda sola la varia per X.
	'ayin, la oio, ia es un otra consonente de "garga profunda." La Elinicas ia usa el per omicron ("O poca"). Los ia developa un varia per omega ("O grande," Ω) e pone el a la fini de se alfabeta. La Romanes ia garda la orijinal per O.
	Pe, la boca, posable ia es orijinal un simbol per un canto. La Elinicas ia usa el per pi (Π). La Romanes ia clui un lado e cambia el a P.
	Sade, un sona entre s e x, es de un orijin nonserta. El posable ia es un simbol per un planta, ma plu tarde pare plu como un unco per pexores. La Elinicas no ia usa el, ma un varia strana es la sampi (Ϡ), un simbol per 900. La Etruscanes ia usa el en la forma de un M per se sona x, ma la Romanes no ia usa el.
	Qof, la simia, posable ia es orijinal un noda. El ia es usada per un sona simile a C ma plu a la dorso de la boca. La Elinicas usa el sola per la numero 90 (Ϙ), ma la Etruscanes e Romanes ia garda el per Q.
	Rex, la testa, ia es usada par la Elinicas per rho (P). La Romanes ia junta un linea per separe el de se P e cambia el a R.
	Xin, la dente, posable ia es orijinal un arco militar. Orijinal pronunsiada x, la Elinicas usa el a se lado per sigma (Σ). La Romanes ia curva el per S.
	Taw, la marca, ia es usada par la Elinicas per tau (T). La Romanes ance ia usa el per T.

---

La letera Elinica phi (Φ) ia es ja comun entre la Anatolianes en la area de Turcia moderne.

Psi (Ψ) pare ia es inventada par la Elinicas, posable fundada a la tridente de Poseidon.

Notas

1. ↑  Asta resente, la plu linguistes crede ce esta popla abita en la deserto Sinai e ia comensa usa se alfabeta en la sentenio 18 aec. En 1998, la arceolojiste John Darnell ia descovre siselas a rocas en la "Vale de Asustas" en Egipte sue, ce forsa la orijin de la alfabeta a la sentenio 20 aec o plu vea. Es posable la inventores ia es un popla semetica ci labora en Egipte, ci plu tarde ia dona se idea a la popla plu este.

Sistemes de scrive			cambia
Logografia	Xines | Ieroglifes | Cuneoforma
Alfabetas silabal	Katakana | Hiragana | Tsalagi | Canadianes orijinal
Alfabetas consonantal	Alfabeta orijinal | Fenesian | Aramaian | Ivri | Nabatean | Arabian | Surian
Alfabetas cuasi-completa	Itiopian | Brami | Devanagari | Cusana | Gupta | Granta | Calinga | Tibetan | Caxmiri | Gurmuci | Gujurati | Sindi | Bangal | Oria | Tai | Mianmar | Sinales | Tamil | Telugu | Canares
Alfabetas completa	Elinica | Etruscan | Latina | Cirilica | Haiaren | Hangul | Runas | Gotica | Eres | Ogam | Glagolitica | Cartuli | Deutx | Coptica | Uigur | Mongol
Otra cosas	Trascrive | Alfabeta Fonetical Internasional | Alfabetas per lfn