Charles Darwin
From LFN
Contenida |
Anios prima
Charles Darwin nase en Shrewsbury, England, a 12 febrero 1809. Se padre es Robert Waring Darwin, un dotor e la fio de Erasmus Darwin, un dotor, scrivor, e naturiste famos. Se madre es Susannah Wedgwood Darwin, ci mori cuando Charles ave oto anios.
Charles es instruida en un scola local par Dotor Samuel Butler. En 1825, el vade a Edinburgh, Scotland, per comensa studia la medica, ma el trova pronto ce esta campo turba se stomaco! Donce, el vade a la Universia de Cambridge, a suprafas per deveni un prete de la Eglesa de England. Ma el es plu interesada par entomolojia — spesial la scarabes — e par la xasa.
On dise ce ance cuando el es un om joven, el ave un mente pasiente e abrida, usante multe oras per colie esemplos de acel o esta varia, e per contempla ideas nova. A acel tempo, la idea de la evolui es discuteda: La naturistes ia comprende plu e plu clar ce la spesies pote cambia e, a fato, ia cambia tra multe milenios. La demanda ia es "como?"
Viaja de la Beagle
Un de se mestres, John Henslow, coraji ce Darwin presenta se per la posto (nonpaiada!) de naturiste en la barcon de esplora HMS Beagle, su la comanda de Capitan Robert Fitz-Roy. A 27 desembre 1831, Charles departi de England a la ves prima. El no reveni asta 2 otobre 1836!
El usa la plu de la viaja per studia la costas de America Sude e la isolas prosima, ma el visita ance isolas varios en la Mar Pasifica, Australia, e Zeland Nova. La Isolas Galapagos el impresa la plu. A esta loca, el trova pinsones (avias poca) con becos varios, e cada beco conveni per un come spesifada. La varia natural ia eleje la becos per conveni a la ambientes varios de la isolas poca.
Cuando Darwin reveni, el scrive libros fundada en se studias de la jeolojia e de la spesies de plantas e animales ce el ia oserva e colie. El publica ance se jornal dial como libro oji conoseda como La viaja de la Beagle (The Voyage of the Beagle). El nota ce el ia es impresada la plu par la modos de ajusta de animales varios a la ambientes ecolojial varios.
Prinsipe de eleje
De la comensa, Darwin reconose ce la eleje es un prinsipe usada con susede par la persones ci eleva la animales. Ma el ia nesesa aora un idea per esplica como la natur fa la mesma taxe sin la avantaje de intelijentia!
En 1838, Darwin leje un libro par Thomas Malthus, titulada Un article supra la prinsipe de la cuantia de popla (An Essay on the Principle of Population). Malthus introdui la idea ce la compete per recursos stabli la cuantia de un spesie, e avisa ce, cuando la recursos es limitada, la poplas umana ta sufri ance!
A 29 janero 1839, Darwin sposi se cusin Emma Wedgwood. Los abita en London tra alga anios, e reposa a pos en la vileta Down, 15 milias de London, do los abita tra la resta de se vives. Darwin comensa sufri de un maladia ce el ia prende probable cuando un inseto morde el en la Andes a multe anios pasada. Francis, la fio de Darwin, ia loda se madre, ci cura dedicada se padre. Sin se sposa, Darwin ia es multe min produinte. Emma e Charles ia ave du fias e sinco fios.
En 1842, Darwin scrive un manoscrito corta de se teoria. En 1844, el scrive un nota: "A fini, brilias luminante ariva, e me es cuasi convinseda (multe contra la opina con ce me ia comensa) ce la spesies no es sin muta (es como confesa un mata)."
Du naturistes
El es cuasi a la media de fini un esposa completa de se ideas, cuando el reseta un article de Alfred Russel Wallace, con un demanda per comentas. La article conserna un teoria de eleje natural! Ance Wallace ia leje Malthus, e en 1858, cuando malada con febre, el crea la tota idea en un momente. Darwin, a causa de se anxia, ia retarda presenta se ideas a la publico siensal tra 20 anios!
Darwin envia la article a se ami, Charles Lyell de la Sosia Jeolojial, seguente la demanda de Wallace. Lyell envia el, con un article par Darwin, per presenta a un conferi siensal.
La idea de ambos naturistes ia es clar: Par un eleje atendente, la persones pote esajera un varia minor cuando los eleva la canes e boves, e, a la mesma modo, la natur eleje alga varias, sola par permete ce la varias plu bon supravive e reprodui en la luta per recursos limitada. La cambias es poca e lenta, ma la milenios permete la varia de natur ce nos vide sirca nos! Darwin ia noma esta idea "la eleje natural".
Publica de la teoria
En 1859, Darwin publica a fini se opera grande: Supra la orijin de spesies par eleje natural. La libro susede pronto. Natural, multe disputas ia ocure, e la plu de los conserna la oposa de ideas ce on ia esplica costumal a modo relijios.
La eleje natural ia es confusada frecuente con un idea presedente de la naturiste franses Jean-Baptiste Lamarck. El ia sujeste ce un animal dona a se enfantes la cualias ce el oteni tra se propre vive. Un esemplo famos es ce, pos multe jeneras de animales ce ia estende la colo per prende la folias alta, la forma strana de la jirafa emerji. Esta teoria — la lamarkisme — ia es la oposante major de la eleje natural tra multe plu de anios!
Otra libros
En 1868, Darwin publica Varia de animales e plantes domada (Variation of Plants and Animals under Domestication), e en 1871, La orijin de la umanas, e la eleje en relata a la seso (The Descent of Man, and Selection in Relation to Sex). Esta es vera du libros en un. La parte du es supra la eleje sesal. Esta dona a la mundo la colores briliante de la avias om, per esemplo: La colores de la omes, e la atrae de la femas flirtante a los, es elejeda per ce esta varias produi bon la enfantes.
La parte de la libro nomada "La orijin de la umanas" es un introdui corta a la idea ce nos es ance la resulta de la eleje natural. Esta parte ia condui a multe disputas calda!
En 1872, La espresa de emosias en la umanas e la animales (The Expression of Emotions in Man and Animals) es publicada. A esta ves, Darwin parla de la evolui de la sinias usada de animales per comunica — e el relata esta sinias a la espresa de la emosias umana. Esta libro es la paso prima a la sosiobiolojia e la psicolojia evolual.
Ajuntada a esta libros multe influente, Darwin gusta ance studia e descrive la plantas. En 1862, el scrive un libro supra la fertili de orcideas par insetos. En 1875 el publica ambos de Moves e abituas de la plantas asendente (Movements and Habits of Climbing Plants) e Plantas insetivore (Insectivorous Plants). En 1877, veni La formas diferente de la flores en plantas de la mesma spesie (The Different Forms of Flowers on Plants of the Same Species). En 1880 el scrive, con se fio Francis, La pote de move en plantas (The Power of Movement in Plants). E en 1881 el publica la libro multe famos Crea de la mofo vejetal par la ata de vermes (The Formation of Vegetable Mould Through the Action of Worms)!
Conclui
Charles Darwin mori a 19 april 1882. El es enterada en la Abaderia de Westminster. Parente, el ia es un om amable e jentil, amada par se familia e se amis. Estra se viaja supra HMS Beagle, el ia departi de se casa en Down a poca veses. Vasilante, el sumita se credes relijios e deveni un agnostiste, ma partisipa ancora con se eglesa en operas de carita.
