Fonetica
From LFN
La fonetica es un parte de la siensa de linguisme. El studia la sonas de la linguas umana. Par metodo fondal, on compare la sonas per conose la distinguis. Per esemplo, p e b es multe simile, ma nos vibra la cordas vocal per b, e no per p. Cada lingua reconose alga distinguis e no otras, e, a alga ves, oia la diferes es no fasil.
Contenida |
Consonantes
Un consonante es un sona ce ave alga resista contra la flue de aira.
Entre la consonantes, un de la diferes la plu fondal es si on vibra la cordas vocal (con vose) o no (sona sin vose): b, d, g, v, z, j, m, n, l e r es consonantes con vose; p, t, c, f, s e x es consonantes sin vose.
Moda de consonantes
- Esplodentes ave un bloca e relasa subita de la flue de aira. En LFN: p, b, t, d, c, g.
- Fricantes ave un bloca partal de la aire, ce crea un sona ru o sibilante. En LFN: f, v, s, z, x, j.
- Africantes comensa par un bloca (como de un esplodente), ma on el relasa sola partal (como un fricante): ts, dz, tx, dj.
- Nasales ave un bloca (como de un esplodente), ma on lasa la aira flue tra la nas. En LFN: m, n.
- Licuidas no ave un bloca, e frica min ce la fricantes.
- Vibrantes es creada par la vibra poca de la lingua. En LFN: r.
- Ladales es creada par pone la lingua a la sentra de la palato e lasa la aira sali a la lados de la lingua. En LFN: l.
- Ladales fricante es entre la ladales e la fricantes: un forma de l en multe linguas, como cimri e polsce.
- Prosimintes es licuidas ce lasa la aire sali supra la lingua: la r en engles american o engles eres.
- Semivocales es sonas prosima a vocales, ma con un poca de restrinje de la aira: i o u ante un otra vocal (i consonantal e u consonantal), o y e w en engles.
Ance:
- Palatalidas es consonantes segueda rapida par un i consonantal: comun en la linguas slavica, como rusce.
- Aspiradas es esplodentes con un poca de espira seguente: comun en la linguas xines e indian.
Loca de consonantes
- Bilabiales usa la du labios: p, b, m; u ante un otra vocal.
- Labiodentales usa la dentes alta e la labio basa: f, v.
- Dentales ave la punta de lingua a la dentes alta: th en engles o z en castelian.
- Alveolales ave la punta de lingua prosima a (ma pos) la dentes alta: t, d, s, z, n, l, r.
- Posalveolales ave la lingua plu pos la dentes alta: x, j
- Retrales curva la punta de lingua a retro, a la sentro de la palato: multe sonas en hindi, o la r en alga dialetos engles american.
- Palatales ave la sentro de la lingua a la sentro de la palato: tx, dj; i ante un otra vocal, la sonas ni- e li- en multe linguas roman.
- Velales ave la sentro de la lingua a la dorso de la palato (= a la velo): k, g, ch en deutx.
- Uvulales usa la uvula, a la entra de la boca a la garga: la r de franses parisian, la h de engles o deutx.
- Farinjales usa la garga pos la uvula: alga sonas de arabian es farinjal.
- Glotales usa la glote (la larinje) per bloca la flue de aira: la sona entre un parola ce fini par a e un otra ce comensa par a.
Vocales
Vocales es sonas con vose (vibra de la cordas vocal), e ce no ave un bloca o resista de la flue de aira. On fa la diferes par la forma de la cavia de la boca, usante la lingua e labios en locas varios.
- Vocales frontal — la lingua es prosima al la fronte de la boca. En LFN: i, e.
- Vocales dorsal — la lingua es prosima a la dorsa de la boca. u, o.
- Vocales sentral — la lingua es sentral en la boca: a.
- Vocales cluida — la lingua es prosima a la palato: i, u.
- Vocales medial — la lingua es a la media entre la palato e la basa de la boca: e, o.
- Vocales abrida — la lingua es a la basa de la boca: a.
- Vocales ronda — la labios forma un sircula: o, u, e la simila vocales frontal de deutx e otra linguas (ö, ü).
- Vocales plata — la labios reposa: i, e, a, e simila vocales dorsal de japanes (la u de suru) e otra linguas.
