Isola Tesoro
From LFN
., |~~,
.)))).))
.).)_)))
/.).)__)_)\ I S O L A T E S O R O
/.)_.)__)__)\\
============--/ (brevida)
\ ====== / par Robert Luis Stivenson
traduida par Gary Miller
Parte un: LA PIRATA VEA
La "can de la mar" vea a La Amiral Benbo
Per ce la proprior Treloni, dotor Livsi, e la seniores restante ia demanda me, ce me scrive la detales de Isola Tesoro da comensa a fini, teninte no cosa sin la loca de la isola, e esta sola per ce es a este ora ricas no levada, me prende un pen en la anio de pardonia 17__, e me me restitui a la tempo, cuando la marinor brun e vea con un cortida de spada comensa abita su nos teto.
Me el recorda, si es ier, cuando el veni forte a la porta de la otel, se baul de mar seguente el en un careta: un om alta, forte, pesa, brun como torca. El dise pos un poca tempo:
- - Ua, donce esta es la dormeria a me. Tu me pote clama Capitan. Ua, me vide esa, ce tu vole-- asi.
E el lansa tre o cuatro pesos de oro ante la ximine.
E, vera, con se abitos tal mal, e parlante tal noncortes, el ave no pare de un om, ci ia naviga ante la masto, ma pare un ofisior o padron, ci abitua resetar obe o dar puni. El ia dirije me a lado a un dia e promete a me un cuatro-senti moneta a prima dia de cada mensa, si me fa simple me "oio per clima abrida a un om navigante con sola un gama", e fa el conoseda a momente, cuando el va apari. La modo, per ci acel carater ia fa me sonias turbada, me no debe nara a vos.
Contra ce me teme multe con la idea de la om navigante con sola un gama, me teme multe min la Capitan ce alga un, ci conose el. Se naradas ia es acel, ce fa la jente plu teme: matar par pende, pasear da plance, tempestes supra mar. El continua resta semana pos semana, a fini mensa pos mensa, e a esta modo tota monetas es consumada, e ance me padre a no tempo colie la corajia per ce insiste, ce el ave plu. Me es serta, ce la turba e teme, in ce el ia vive, debe fa se mor prematura e nonfelis plu pronto. La Capitan reseva a no tempo un nota, e el parla con no person esetante la visinas, e con los plu frecuente cuando ebria con rum.
El deveni coler a sola un ves, e acel es a la fin, cuando me padre povre es en la malada, ce mata el. Dotor Livsi ia veni a un posmedia tarde, per ce vide la malador, aseta un poca come da me madre, e vade a la salon, per ce fuma se pipa, asta ce se cavalo veni da la vileta, per ce nos ave no stala a la Amiral Benbo. Subita el-- la Capitan, acel es-- comensa canta se cantada eterna:
Des sinco omes supra baul de morida -- Io-o-o e un botela con rum!
Esa es nova a esta note a no person esetante dotor Livsi, e a el, tal me nota, esa no fa un efeta agreante, per ce el regarda multe coler a un momente, ante ce el continua conversa con vea Teilor, la jardinor, de un medisin nova de artrit. La Capitan el regarda forte, colpa la mano supra la tabla, regarda plu forte, e a fin cria con un jura maldisente e de vil:
- - Fa tu silenta, ala entre niveles!
- - Es ce tu a me clama, senior? Me ave un cosa sola, per ce a tu dise, senior: Si tu continua a bevi rum, la mundo va manca pronto un vil vera bruta!
La om vea salta a pedes, tira un cotel pliable de marinor, e, balansante esa supra la palma de la mano, menasa ce el va fisa la medicor a la muro.
La medicor move a no tempo.
- - Si tu ne repone pronto acel cotel en la pox, me promete de me onora, ce tu va pende en la corte legal seguente.
La Capitan sede pronto, retorna se arma, e se retorna a senta, roncante como can batada. La medicor continua:
- - E esta ora, senior, per ce me conose, ce es en me distrito tal om, tu pote es serta, ce me ave la oio supra tu entre dia e note. Me es no sola un medicor; me es un judor.
Pronto pos acel la cavalo de dotor Livsi veni a la porta, e el vade da ala. Ma la Capitan silenti a esta sera, e a multe seras seguente.
La sircula negra
Cosas ia pasa con esta modo, e, sirca la ora tre de un posmedia amarga, nebla e jela, me sta momente ante la porta, cuando me vide un om, ci prosimi lenta longo la rua. El es clara sieca, per ce el tape ante se con un baston e porta un cortineta verde e grande ante la oios e nas. El sta poca ante la otel e, comensa parla con vose con modo canta, salva strana, dirije se a la aira ante se:
- - Alga ami de un cor bon dona la informa a om sieca e povre, ci ia perde vide valuable de oios entre la defende amante de la pais de se nase, do o en ce parte de esta pais es aora el?
- - Tu es a la "Amiral Benbo", Caveta Colinanegra, me om bon.
- - Dona a me un mano, me ami de un cor bon, e dirije me en ala.
Me estende un mano, e acel creado monstra e sin oios, ci ia parla mol, teni pronto el, como abrasador.
- - Dirije me direta en ala, o me va rompe la braso! Dirije me direta a la Capitan, e, cuando me es en se vista, cria: "Regarda un ami per tu, Bil."
La Capitan compatable leva la oios, e, con sola un regarda, la rum vade da el e lasa, ce el es sobre.
--Aora, Bil, tu resta ala, do tu senta. Fio, prende se mano sinistra a la polso e dirije el a me destra.
Ambos nos obe el seguente cada letera, e me vide, ce el pasa un serta cosa da la caveta de se mano, ce teni la baston, a la mano de la Capitan, ce clui pronto sirca esa. La om sieca dise:
- - E aora esta es finido.
E, pos esta parolas, el me relasa pronto e, con esatia e espertia noncreable, salta da la salon e a la rua, do, entre ce me sta sin move, me pote oia la baston vade con tape-tape-tape a distante.
Pos un tempo, me relasa la polso de la Capitan, ce me teni ance, e el tira la mano e regarda direta en el. El cria:
- - La ora des! Ses oras resta!
E el salta a la pedes. Entre ce el fa esta, el fa un paso mal, pone un mano supra la garga, sta con rola e, pos esta, con un sona strana, cade da la altia plen a la fas supra la solo. Es un cosa curiosa per comprende, per ce me gusta la om a no ves, contra ce me ia comensa senti compati a el, ma, cuando mi vide, ce el ia mori, me esplode con un deluvia de larmas.
La baul de la mar
Me perde no tempo, natural, per dise a me madre cada cosa, ce me conose, e, posable, ia debe dise a el ante un tempo longa, e nos nos vide aora en un situa difisil e perilos. A fini, ocure a nos, ce ambos nos va vade e xerca aida en la vileta visina. La soma de la cosa es, ce, entre ce nos oteni poca omes, ci vole basta viaje a dotor Livsi, ci es a la otra dirije, no un vole aida, ce nos defende la otel. Me madre no vole, el declara, perde moneta, ce parteni a se fio. Cada person cria per nos stupidia.
Nos lisca longo la ensircas de arboretas sin ruido e con modo rapida, e nos no vide alga cosa, ce aumenta la teror, asta ce, a nos pas grande, la porta de la Amiral Benbo se clui pos nos. La Capitan reposa, como nos el lasa, supra la dorso, con oios abrida e un braso estendeda. Me madre dise:
- - E aora, nos debe estrae la clave da _acel_.
Supra la solo prosima a se mano es un sircula poca de paper, negra a un lado. Me senti en se poxes, un pos la otra. Pos ce concista un desgusta forte, me lasera la camisa da se colo, e ala, fisada a un peso poca de cordeta vea, nos trova la clave. Pos esta vinse, nos nos plen con espera e freta a supra sin retarda a la camera poca, do el ia dormi en la pasada e do se caxa sta pos la dia de su ariva. Contra ce la securador es multo rijida, me madre esa torse e leva pronto la covre.
E la diferia comensa: un cuadrador, un contenador da stanio, poca bastonetas de tabaco, un duple de fusiletas multo bela, un peso da un bara de arjento, un orolojeta vea e poca cosetas de poca valua e fade stranjer, un duple de busolas fisada con laton. E reposa ante nos la cosas restante en la baul, un faxo, evidente paperes, liada con stofa covreda con olio e un saco da lona, ci dona con un toca la sona de oro. E me madre comensa conta la cuantia de la conta de la Capitan da la saco de la marinor a la saco, ce me teni. Es un cosa longa e difisil, per ce la monetas es de cada pais e grandia.
Cuando nos ia es finida a la media, me pone un mano a se braso, per ce me ia oia en la aira silenta e jela un sona: la tape-tape de la baston de la om sieca supra la rua jela. Me dise:
- - Madre, prende la tota e nos vade!
El dise, ce el conose se diretos e el va ave los. El ance disputa con me, cuando un sibila se sona multo distante supra la colina. Me madre dise, entre ce salta a la pedes:
- - Me prende acel, ce me ave aora.
Me dise, entre ce prende la faxo covreda:
- - Me prende esta, per ce fa la conta cluida.
Seguente acel, nos abri la porta e se retira rapida. Nos es a la ponte poca, bonfortuna.
La fini de la om sieca
Me no pote resta, do me ia es, ma rampe ance ora a la riva, da do, durante fa un arboreta la scermo de me testa, me pote oserva la rua ante nos porta. Multe pronto pos me es a me posto, me enemis comensa ariva, sete o oto, durante core forte, los pedes bata la rua con tempo nonregula, e un om con un lampa a la ante. Tre omes core junta, mano en mano; e me reconose, vera tra la nebla, ce la media de la tre es la om sieca. El cria:
- - La porta a su!
Me pote oia la sona de los pedes scudente la scalera, per ce la tota casa scude per esta. Un lansa la fenetra abrida de la camera de la Capitan con un bata e la sona de vitro rompente; un om, testa e spalas, se inclina en la lus de la luna. El cria:
- - Piu, los es asi ante nos.
- - Es la oteleros. Es acel fio. Se sperde, bonomes, e trova los!
A esta ora, es un turba grande tra la tota otel, pedes pesa batante a asi e ala, mobilas lansada, portas rompeda, asta ce la rocas eco e la omes sorti ance ora a la rua, e declara, ce nos es nontrovable. Pronto a esta ora, la mesma sibila, ce asusta me madre e me con la moneta de la om mor. Un dise:
- - Nos debe fuji, bonomes!
La coleria de Piu deveni tan forte a esta sujeste, asta ce la sentis concista el, e el bata a los a destra e sinistra per la siecia, e se baston sona pesa supra plu ce un.
Durante esta combata continua, un otra sona veni da la culmine de la colina a la lado de la vileta: la pasos de cavalos corente. La piratas se torna pronto e fuji, durante separe a cada dirije-- un a la mar longo la caveta, un otra con modo angula tra la colina e modos simile, per ce, pos un media de un minuto, no pare de los resta sin Piu. Piu se torna con un cria e fuji su la plu prosime de la cavalos veninte. Alga novas de un barca strana en la Caveta de Cit ia veni al superior Dans e envia el a nos dirije, e a acel caso me madre e me debe la salva contra mori. Piu es mor.
Senior Dans no comprende la sena.
- - Ce en la mundo los ia vole?
- - Vera, senior, me ave la cosa en la pox a prosima me peto. Me pensa, ce dotor Livsi posable--
- - Perfeta coreta, perfeta coreta. Un don e un judor. Doger, tu ave un cavalo bon. Prende esta fio pos tu.
La papares de la capitan
Nos vade forte tra la tota viaja, asta ce nos prosimi la porta de dotor Livsi.
Asi senior Dans desende, e, dirijente me con se, es permeteda con se parola en la casa.
Un domestico dirije nos longo un coredor con tapeto e presenta a nos un camera de libros, armarios de libros a cada borda, do la proprior de la terena e la medicor ia senta. La medicor dise con un "si" de la testo:
- - Entra, senior Dans.
La superior sta reta e rijida, e dise la istoria como un leson. Tu ia debe vide, como la du seniores se inclina e regarda un la otra. La medicor dise:
- - E con tal modo, tu ave la cosa, ce los ia vole?
- - Asi, senior.
E me dona a el la faxo covreda con olio. La faxo es liada con filos, e la medicor debe prende se portautil e corti los con se sisor medical. Esa ave du cosas: un libro e un paper cluida con tapos de sira. La medicor dise:
- - A prime, nos gusta la libro.
A la paje prime, es simple un poca scrivedetas, tal cosas alga un con un pen pote fa per anoia o practica. La des o des du pajes seguente es plen con entras strana: Es un data a un fini de la linia e un soma de moneta a la otra, ma, en loca de scrivedas esplicante, simple un cuantia variante de cruses entre la du. La proprior cria:
- - Esta cruses representa la nomes de barcones o viletas, ce los ia afonda o ataca.
- - Coreta! E la somas aumenta, vide, cuando el ia gania un ofisia plu bon.
- - E a esta ora la otra.
La medicor abri la tapos con cauta grande, e permete, ce un map cade-- un map de un isola con la mesuras jeografial, mesuras de profundias, nomes de colinas e baias e entras, e cada detalio, ce alga un debe ave, per ce gida un barcon a ancor secura a prosima la costa. La proprior dise:
- - Doman me departi a la porto. Nos ave la barcon plu bon, senior, e la ecipo plu bon de la pais. Hocins va veni como "la fio de la cabana". Tu, Livsi, va es "la medicor de la barcon".
- - Treloni, es sola un om, ce me teme: tu, per ce tu no pote frena tu lingua.
- - Livsi, me va es tal silenta ce un grave.
Parte du: LA COCOR DE LA MAR
Me vade a la porto
Es plu longa, ce la proprior ia imajina, ante ce nos es pronto per la mar, e no scemas prime de nos-- ance no de dotor Livsi-- es fada, como nos ia intende.
La semanas pasa tal, asta ce, a un dia, un nota veni, dirijeda a dotor Livsi, con esta scriveda plu:
ABRI, A CASO DE EL ASENTIA, PER JUVEN HOCINS
* * *
Otel "Ancor Vea", 1 marto 17__
Cara Livsi,
La barcon es comprada e furnida; nom, _Ispaniola_. Me ami ancian
Blandli ia labora como un sclavo per me interesa e-- permete, ce
me dise-- cada un en la porto ia fa la mesma.
Es la ecipo, ce ia dona turba a me. Me ia vole sirca dudes omes
-- a caso de jentes savaje o piratas-- e me ia ave turba diablal
per trova simple ses, asta ce la fortuna bon plu comentable
dirije a me la om vera, ce me debe ave. Me descovre, ce el es un
marinor de esperia, manteni un bar, conose cada marinor en la
porto, ia perde se sana a la tera e, a esta ora, vole un leto
como cocor per ce es ance ora supra la mar. Per compati pura, me
emplea el per ce es la cocor de la barcon. "Longa Jon" Silver el
es clamada e ia perde un gama.
Entre Silver e me, nos colie un ecipo de la marinores plu
durante, ce un pote imajina.
Me es en la sania e spirito multo bon; me come como un bove,
dormi como un arbor, ance me ne pote plase un momente, asta ce me
va oia me marinores bon con paso pesa sirca la bobinon de la ancor.
Jon Treloni
Posscriveda: Me ia oblida dise a tu, ce Silver es un om de
medio; me conose con me propre descovre, ce el ave un conta en la
banco, ce manca a no tempo.
J.T.
* * *
Polvo e armas
La _Ispaniola_ ia reposa a distante, e nos vade su la figuras de la proas e sirca la popas de multe otra barcones. Ma, a fin, nos sta a la lado de nos barcon e es encontrada e riseta salute militar, cuando nos asende.
La capitan es un om parente militar, ci pare coler per cada un en la barcon, e va dise pronto la causa, per ce nos apena desende a la cabana, cuando un marinor nos segue.
- - Capitan Smollett, senior, per demanda dise con tu.
La proprietor dise:
- - Presenta el.
La capitan, ci es prosime pos la mesajor, entra pronto e clui la porta pos se.
- - Donce, senior, es plu bon parlar clara, me crede, mesma a risca de ofende: La viaja no plase a me; la marinores no plase a me.
- - Posable, vos empleador no plase a tu?
Asi dotor Livsi interompe:
- - Es nonusable demandar con tal modo, ce fa sentis mal.
La capitan dise:
- - Me ia es empleada, senior, con esta, ce nos clama "comandas cluida", per ce naviga esta barcon a do acel senior demanda a me. Seguente, me trova, ce nos xerca tesoro-- me oia esta par me propra marinores, atende. Me crede, ce ne un da vos seniores conose, ce vos fa.
Dotor Livsi responde:
- - Seguente, tu dise, ce la ecipo no plase a tu?
- - Los pone la polvo e la armas en la cala fronte. Vos ave un loca bon su la cabana; per ce no pone los ala? E me dise a vos, ce me mesma ia oia: ce vos ave un mapa de un isola, e ce la isola es situada a--
E el clama la situa precis de la isola.
La proprietor cria:
- - Me dise esta a no tempo a alga un!
A esta caso, me crede, ce el es coreta, e ce no person ia dise la situa de la isola. La dotor dise:
- - Me comprende. Tu vole, ce nos manteni esta cosa ascondeda e fa un defenderia de la parte popa de la barcon. Con otra parolas, tu teme un rebela.
- - Me demanda, ce vos aseta serta atendes o permete, ce me abanda me carera.
La dotor comensa con un surie:
- - Cuando tu ia entra, me dona me peruca un aposta, tu vole plu ce esta.
- - Cuando me ia entra, me pensa, ce me va es desempleada.
La proprietor cria:
- - Me va ata, como tu vole. Ma me pensa plu mal supra tu.
E con esta la capitan aseta retira. La dotor dise:
- - Treloni, contra cada me ideas, me crede, ce tu ia susede oteni du omes onesta en la barcon con tu: esta om e Jon Silver.
POLVO E ARMAS
La _Ispaniola_ ia reposa a distante, e nos vade su la figuras de la proas e sirca la popas de multe otra barcones. Ma, a fin, nos sta a la lado de nos barcon e es encontrada e riseta salute militar, cuando nos asende.
La capitan es un om parente militar, ci pare coler per cada un en la barcon, e va dise pronto la causa, per ce nos apena desende a la cabana, cuando un marinor nos segue.
--Capitan Smollett, senior, per demanda dise con tu.
La proprietor dise:
--Presenta el.
La capitan, ci es prosime pos la mesajor, entra pronto e clui la porta pos se.
--Donce, senior, es plu bon parlar clara, me crede, mesma a risca de ofende: La viaja no plase a me; la marinores no plase a me.
--Posable, vos empleador no plase a tu?
Asi dotor Livsi interompe:
--Es nonusable demandar con tal modo, ce fa sentis mal.
La capitan dise:
--Me ia es empleada, senior, con esta, ce nos clama "comandas cluida", per ce naviga esta barcon a do acel senior demanda a me. Seguente, me trova, ce nos xerca tesoro-- me oia esta par me propra marinores, atende. Me crede, ce ne un da vos seniores conose, ce vos fa.
Dotor Livsi responde:
--Seguente, tu dise, ce la ecipo no plase a tu?
--Los pone la polvo e la armas en la cala fronte. Vos ave un loca bon su la cabana; per ce no pone los ala? E me dise a vos, ce me mesma ia oia: ce vos ave un mapa de un isola, e ce la isola es situada a--
E el clama la situa precis de la isola.
La proprietor cria:
--Me dise esta a no tempo a alga un!
A esta caso, me crede, ce el es coreta, e ce no person ia dise la situa de la isola. La dotor dise:
--Me comprende. Tu vole, ce nos manteni esta cosa ascondeda e fa un defenderia de la parte popa de la barcon. Con otra parolas, tu teme un rebela.
--Me demanda, ce vos aseta serta atendes o permete, ce me abanda me carera.
La dotor comensa con un surie:
--Cuando tu ia entra, me dona me peruca un aposta, tu vole plu ce esta.
--Cuando me ia entra, me pensa, ce me va es desempleada.
La proprietor cria:
--Me va ata, como tu vole. Ma me pensa plu mal supra tu.
E con esta la capitan aseta retira. La dotor dise:
--Treloni, contra cada me ideas, me crede, ce tu ia susede oteni du omes onesta en la barcon con tu: esta om e Jon Silver.
LA VIAJA
En la tota note, nos es en ocupada grande, durante pone cosas en la propra loca, e barcas de la amis de la proprietor, senior Blandli e simile, veninte per ce desira a el un viaja bon e un reveni secura. Me es fatigada multo, cuando, a un poca ante la comensa de la dia, la dirijor sona se sibilador, e la ecipo comensa prende la baras de la bobinon. Un vose cria:
--Aora, cocor, comensa un strofe a nos.
--Si, cameradas.
Longa Jon, ci sta prosime con se baston su se braso, comensa pronto con la melodia e parolas, ce me conose tal bon:
Des-sinco omes supra la baul de un morida--
E la tota ecipo continua la recanta:
Io-o-o, e un botela con rum!
e, con la "o!" tre, presa la baras ante se con vole forte. Pronto la velas comensa se pleni e la tereno e la barcones pasa a ambos lados.
Me no nara la viaja con la detales. La barcon ia es probada bon, la ecipo ia es marinores capas e la capitan conose completa se labora. E la gidor, Israel Hands, ia es un marinor atendente, esperto, vea e esperia, a ci un pote confide en turba cuasi cada cosa.
Es un stona, ce vide Longa Jon Silver presa la pede de se baston contra un muro e, entre ce se apoia contra esa e sede a cada move de la barcon, fa la coce, como alga un a la riva. La tota ecipo respeta e obe mesma el. El es a tota tempo felis, cuando el me vide en la cosina, ce el manteni vera limpa: el suspende la platos bridiada e se papagaio en un panier en un canto. El dise:
--Asi es Capitan Flint-- me clama me papagaio Capitan Flint, segundo la pirata famos.
E la papagaio dise con rapidia grande:
--Monetas de oro! Monetas de oro! Monetas de oro!
asta ce un se demanda, ce es perde respira, o asta ce Jon lansa un tela supra la panier.
Aora, a un sera pronto pos ce la sol ia desende, cuando me completa tota me labora, e me vade a me leto, ocure a me, ce me vole un poma. Me scala en la rolador e trova, ce cuasi no poma resta. Me o dormi o cuasi dormi, cuando un om pesa senta prosima con un ruido forte. El scude la rolador, cuando el apoia se spala contra esa, e me cuasi salta, cuando me oia, ce la om comensa dise.
ASI ACEL, CE ME EN LA ROLADOR IA OIA
Silver dise:
--Tu comprende: tu es joven, tu es, ma tu es intelijente. Asi de omes jentil de fortuna: Ia es alga un, ci teme Pew, e alga un Flint; ma Flint mesma teme me.
Un joven responde:
--Me ama la cosa no a media, asta ce me conversa con tu, Jon. Ma aora me dona a tu me mano.
Silver fa un sibila poca, e un om tre prosimi e se senta con la du. Silver dise:
--Dik es acordante.
La vose de la gidor, Israel Hands, responde:
--A cuanto tempo nos espeta como un barcon cortes blasfemada?
--Tu va dormi en proa, labora bon, es silenta e es sobre, asta ce me dise. Nos pote gida la barcon, ma ci pote projeta la viaja? Cuanto barcones alta me ia vide atacada?
--Es otras, ci pote labora e gida bon como tu.
--Do es los aora? Pew ia es como los, e el mori un povror. Flint ia es, e el mori per rum.
Dik demanda:
--Cuando nos los ataka, e ce nos fa a los?
Cuasi a mesma tempo, la vijilor kria:
--Asi tera!
CONSILIA DE GERA
Es freta de pedes tra la ponte. A la sude-ueste nos vide du colinas basa e, se leva pos un da los, un colina tre e plu alta, ce culmine es en nebla. Me vide esta cuasi en sonia, per ce aora me no recovre da la teme asustante ante un o du minutos.
Dotor Livsi clama me a se lado. Ma, cuando me es basta prosima per dise, sin ce otras oia, me pronto comensa:
--Dotor, permete, ce me dise. Fa, ce la capitan e proprietor vade a la cabana e, pos esta, projeta, per ce me veni.
La cosa seguente, ce me oia, es la capitan dona un comanda e un sibila, per ce cada marinor veni a ponte. Capitan Smollett dise:
--Senior Treloni e me e la dotor vade en la cabana, per ce bevi per vos sania e felisia, e nos dona bevidas a vos, per ce vos pote bevi per nos sania e felisia.
Longa Jon cria:
--Un aclama per Capitan Smollett!
Con acel la tre omes vade su la ponte, e, no longa pos acel, me reseta un comanda, ce Jim Hokins debe vade a la cabana. La proprietor dise:
--Aora, Hokins, tu ave un cosa per dise.
Me ata, como demandada, e, corta como me pote fa acel, nara cada detal de la conversa de Silver. La proprietor dise:
--Aora, Capitan, tu ia dise coreta, e me ia dise falsa.
--Me proposa esta: Saisi la vantaje de tempo, e combata entre un dia bon, cuando los no espeta esta.
La dotor dise:
--Jim asi pote plu aida nos ce alga un. La omes ata libre con el, e Jim nota multe.
PARTE TRE: ME AVENTURA A LA RIVA
COMO ME AVENTURA A LA RIVA COMENSA
La aperi de la isola, cuando me ia asende a la ponte a matina seguente, ia es cambiada completa. Forsan ia es esta-- forsan la aperi de la isola con la foresta gris e triste e con tores savaje de petra, e con la surfa, ce nos pote vide ambos spumante e tonante a la plaia scarpa-- minima contra ce la sol brilia calda e la avias de la riva prende pexes e cria sirca tota nos, e vos pensa, ce alga un debe es felis per ce oteni tera pos ce es tal longa a la mar, ce me cor cade, seguente la diseda, en la botas.
Nos ave un dia de labora fatigante ante nos, per ce es no sinia de venta, e la marinores debe tira e dirije la barcos. La caldia boli nos, e la marinores murmure forte per la labora. La vide de la isola ia laxe la cordas de obia.
La bate de la ancor a la acua fa, ce nubes de avias fuji e cria en la foresta. La loca es ensircada tota de tera e enterada en la foresta, con la arbores desendente a la sinia de la acua alta, la rivas plata a la plu parte, e la culmines de la colinas sta sirca nos simile a un stadio. No es un respira de aira, e no sona esetante la surfa longo la plaias e contra la rocas a estra.
La marinores reposa a la ponte, durante murmure junta en parla. Rebela, es clara, pende supra nos como un nube de tempeste. Longa Jon labora forte, durante vade da grupo a grupo e dona consela bon, e, como un esemplo, no om pote mostra un plu bon.
Nos senta en consilia en la cabana. La capitan dise:
--Silver es nervos como vos e me per ce covre cosas. El dise consela contra esta a los, si el va ave la acaso. Si un parte da los vade, Silver va fa, ce los se retorna a la barcon jentil como oveetas.
La Capitan vade a la ponte e clama a la ecipo:
--Bonomes, nos ia ave un dia calde e aora es fatigada e nonnormal. Vos pote prende la barcos, e los, ci tal vole, pote vade a la riva entre la posmedia.
La capitan rapida pronto da vide e donce permete, ce Silver organiza la ecipo. Ses omes debe resta en la barcon, e la restantes con Silver comensa parti.
La ora en me testa la prime da la ideas demente ocure, ce aida per ce salva nos vives. Me se lisca tra la lado e asconde me en la velas de la barco plu prosima. La barco, en ce me ia es, pos comensa, es plu lejera e con omes forte rapida ante la otra, e la proa bate entre la arbores de la riva. Me prende un ramo e leva me da esa e core entre la arbores plu densa. Saltante, inclinante me, e presante, me core direta seguente me nas, asta ce me no pote core.
LA OM DE LA ISOLA
Da la lado de la colina, ce asi es scarpa e de petras, un flue de rocetas veni e cade, entre ce salta a tra la arbores. Me oios se dirije natural ala, e me vide un figura salta con rapidia grande pos la baul de un arbor. El pare oscura e capelos. Da baul a baul la animal freta como un servo, core umanin con du gamas, ma, nonsimile a alga om, ci me ia vide ja, inclina se, entre ce el core.
Me determina me fas a esta om de la isola, e vade con fortia a el. El esita, tira se a pos, reveni a ante, e a fin, a me surprenda e confusa, lansa se a la jenos e teni se manos fisada en prea. Me demanda:
--Ci es tu?
--Ben Gan. E me no ia parla con un cristan entre tre anos.
El porta veste con pesos de la lona de velas vea; e esta pesos es fisada con un ordina de varios e nonsimile fisadores: botones de laton e pesos de rametas. Me cria:
--Tre anos! Per desastre?
--No, ami, abandada ante tre anos e vive per come capras pos acel, e bacas e ostras. Multe ia es la notes, entre ce me ave sonias de ceso-- a plu multe veses tostada-- e velia se ance ora, e me es asi.
Entre la entier tempo, el senti la material de me jaca e me manos, regarda me botas e, entre ce el dise, mostra un plase enfantin en la compania de un creada simile. El cria:
--Ce tu se clama, ami?
--Jim.
--Aora tu no pensa, ce me ia ave un madre relijios, cuando tu regarda me. Ma es Dio, ci pone me asi. Me pensa de tota en esta isola sola, e me es ance ora relijios.
E, entre regarda tota sirca se con un vose cuieta a un xuxa, el dise:
--E, Jim, me es rica.
Me determina pronto dise a el la nara entier de nos viaja e de la turba, en ce nos se aora trova. El continua:
--Donce tu va dise esta a tu proprietor: Gan es un om bon, tu dise, e el confide multo multe-- multo multe, atende-- un om jentil naseda ce acel "omes jentil de fortuna", pos ce el mesma ia es un.
--Como me retorna me a la barcon?
--Es me barceta, ce me fa con esta du manos. Me teni el su la roca blanca-- Ce ia es acel?
Per ce, contra ce la sol ave aora un o du oras, tota la ecos de la isola se velia e fa ruidos con la tona de un canon.
Me comensa core a la ancoreria, pos ce me ia oblida tota terores. La dispara de la canon es seguente, pos un tempo longa, de un seri de disparas de armas poca. Pos un otra tempo, me vide ante me la bandera de la barcon fluente en la aira supra la foresta.
PARTE CUATRO: LA ENSIRCON
LA FORTERIA EN LA ENSIRCON
La ora Ben Gan vide pronto la bandera, el para me a me braso e senta se.
--Ua, en un loca como esta, do no un veni esetante "omes jentil de fortuna", Silver debe mostra la "Rojer Felis", tu fa no duta de acel. Acel es tu amis. Cuando vos vole Ben Gan, tu conose do un el va trova.
--Me creda, ce me comprende.
--Bon, donce, me pensa, ce tu pote parti, Jim.
A la moment seguente, ambos nos fuji a dirijes diferente.
La _Ispaniola_ reposa ance ala, do el ia ancori. Ma, serta, es la "Rojer Felis"-- la bandera negra de piratia-- fluente da la culmine.
Pos un tempo longa, me pensa, ce me pote retorna me a la ensircon. Donce me prosimi a la foresta, asta ce me veni a la dorso, o lado rival, de la ensircon, e la grupo fidel me salute pronto.
Me dise pronto me narada e comensa regarda sirca me. La venteta fria de la sera sibila tra cada fesur de la dom ru e polva la solo con un pluveta continuante de arena fine.
Si cada nos ia senta sin labora, cada nos resta sin espera, ma Capitan Smolet no es la om per acel: El clama cada laborante ante se e divide nos como vijilores. Un ves la dotor dise:
--Es acel Ben Gan un bonom?
--Me no es serta, ce el ave sania de mente.
Pos ce nos ia come carne de porco, la tre xefes se colie en un canto per ce discute nos fortunas. La dotor dise:
--Donce, si los nos no fusila pronto, los va es felis per fa prepare la barcon.
Cuando me dormi, ce no ia es sin cuanto de torsa, me reposa como un tronco. La resta ia es longa veliada e come ja e aumenta la pila de lenio con media cuanto, cuando me es veliada per movia e la sona de voses:
--Bandera de trata! Mesma Silver!
LA PARLA DE SILVER
Ia es aora matina pronto, e la matina plu fria, en ce, me pensa, es me a alga ves a stranjer. La capitan es supra la veranda, entre ce se teni da la via de un boleta tradinte, si alga un vole acel. El se torna a nos e dise:
--Vijila, bonomes, e atendente!
Aora el se torna a la rebelores:
--E ce vole tu con la bandera de trata?
--Capitan Silver, senior, per ce asende e parla.
--"Capitan" Silver! No conose el.
--Esta bonomes eleje me capitan, pos tu abanda, senior.
--Si tu vole parla con me, tu pote veni.
--Un parola da tu es basta.
Me ia abanda la fora per survide a la este e vade cuieta pos la capitan, ci aora se senta en la porta con la codos supra la jenos. Aora el prosimi la ensircon, lansa su baston, leva se gama supra esa, e con enerjia e espertia grande susede a asende la ensircon e cade secura a la otra lado. El porta su veste plu bon: un jaca azur e grande, pesa con botones de laton, pende basa a se jeno, e un xapo fine con redeta coseda supra su testa. El cexa:
--No permete tu, ce me vade en la casa?
--Ce, Silver? Si a tu ia plase es un om onesta, tu pote senta en tu cosina.
--Aa, es Jim! Ai, donce, tu comprende, ce tu ia ata bon entre la note. Me no nega, ce poca me omes ia trema-- posable cada trema.
Me pensa, ce el ia visita la piratas, entre ce cada reposa sirca la foco. Silver dise:
--Nos vole acel tesoro, e nos va ave esa-- esta es nos frase xef! Esta, ce me intende, es ce nos vole vos mapa.
--Me va vide, ce tu e la tota isola es colpada tota da la acua ante acel.
Esta coleria poca pare calma Silver.
--O vos veni a lado de nos, pos nos carga la tesoro, e, a la ora, me dona a tu me promete con me onora per pone vos secura a tera.
--Si cada vos veni un pos un sin arma, me va lia cada vos con cadenas e restitui vos a nos pais de nase a un prosede justa.
La oios de Silver trema en la testa con coleria. Entre ronca la menasas plu blasfemos, el scala longo arena, asta ce el pote teni la veranda e se leva a se baston. El cria:
--Los, ci va mori, es la fortunas!
E, con un blasfema teroros, el malpasa da acel loca, se presa tra arena e desapari pos un momente entre la arbores.
PARTE V: ME AVENTURA DE MAR
COMO ME COMENSA ME AVENTURA DE MAR
Ia es no reveni de la rebelores-- ne un fusila da la foresta. Pos la come, la proprietor e la dotor se senta a la lado de la capitan a un tempo en reuni. Pos los ia parla asta la contente de los cores a un poca pos mediadia, la dotor prende se xapo e fusiles de mano, porta un cotelon a la sintur, pone la mapa en pox e, con un pafil a la spala, crusi la ensircon a la norde lado e parti rapida tra la arbores. Me dise:
--Si me es koreta, el vade per ce vide Ben Gan.
Me komensa invia la dotor, entre ce el pasea en la fresca ombra de la foresta con la armas a la sintur e la odore de la pinos, entre ce me senta e coce, e me veste calda aderi a me, e me ave un desgusta de la loca, ce es forte cuasi como teme. Me prende un duple de pafiles de mano, e, per ce me ia ave un corno con polvo e boletas, me senti me furnida bon con armas. Ma, per ce me es serta, ce me no va ave permete per lasa la ensircon, me desinia sola es, ce me abanda e sorti fura, cuando no un vijila. Me sorti direta a la costa este de la isola, per ce evita cada acaso de oserva da la loca de ancor.
La _Ispaniola_ es mirorida ala, entre ce la Rojer Felis pende da culmine. A lado reposa un de la barcetas, Silver en la popa-- me a tota tempo pote reconose el-- entre ce du omes apoia se supra la muro de la barcon. La barceta parti pronto e vade al la riva, e la omes vade a su a prosima la cabana.
La roca blanca, vidable sufisinte supra la tereno spesa, ia es un oti da milia a distante, e a me un tempo longe nesesa per oteni el, entre ce me vade con cuatro membros entre la arboretas. Direta su el, serta basta, es un caveta vera poca da erba verde, ascondeda con rivas e tereno spesa, ce crese ala multe, e, en la sentra, es un tenda poca da peles de capras. Mi lasa, ce me cade en la caveta, leva la lado de la tenda, e ala es la barceta de Ben Gan-- fada nonpaiada, si alga cosa ia es fada nonpaiada: un cuadra ru e nonplata da lenio forte e un covre da peles de capras stretida supra el con la capel a entre. Me a no tempo ia vide un "coracle", como la Britones antica ia fa, ma me ia vide un pos acel, e me no pote dona a vos un idea plu bon de la barceta de Ben Gan, ce me dise, ce el es como la coracle prima e plu mal, ce un om a tota tempo ia fa.
Entre tota, me ia oteni un otra idea: Me va vade fura su la covre de note, corti la _Ispaniola_ libre e lasa, ce el vade a la riva, a alga loca, ce el vole. Me senta me per espeta oscuria. La marea basa ia core a tempo longa, e me ia vade tra un zona da arena de pantan, do veses poca me afonda a la talo, ante ce me veni a la borda de la acua sortinte e, pos vade poca tra la acua, con fortia pone me coracle a la suprafas.
LA MAREA BASA CORE
La _Coracle_ es la vaso plu lado-vade, nonregula per dirije. Con fortuna bon, como me usa la remo, la marea ance porta me.
La _Ispaniola_ sta ante me prima como un loca da un cosa plu negra ce oscuria, pos acel la mastos e corpo comensa se mostra, e rapida pos acel, me es asta la corda de la ancor e teni el.
Me prende me cotel, abri el con me dentes e corti un parte de la corda pos la otra.
