La Sermo a la Montania

From LFN

La Sermo a la Montania es un sermo par Jesus Cristo en la Atesta Nova de la Biblia. El es probable la plu conoseda sermo de la mundo crististe, e conteni la plu de la ideas de moralia ce Jesus ia presenta. Sequente es un tradui, con la nomes comun per la sesiones en leteras forte:

Mateo 5

La Bondises

1 Cuando El ia vide la multe, El ia vade supra la montania. E, cuando El ia resta, se seguentes ia veni a el.

2 E El ia abri se boca e ia instrui los, disente:

3 Bondise es los ci es povre en spirito, per ce la renia de sielo es de los.

4 Bondise es los ci lamenta, per ce los va es comfortada.

5 Bondise es los ci es umil, per ce los va erita la tera.

6 Bondise es los ci es fama e seto per justia, per ce los va es omplida.

7 Bondise es los ci pardona, per ce los va es pardonada.

8 Bondise es los ci es pura en la cor, per ce los va vide Dio.

9 Bondise es los ci oteni pas, per ce los va es clamada la enfantes de Dio.

10 Bondise es los ci es perseguida per la causa de justia, per ce la renia de sielo es de los.

11 Bondise es vos cuando personas maltrata vos e persegui vos e dise multe formas de mal contra vos a causa de me.

12 Selebra e es multe joios, per vos recompensa en sielo es grande, per ce la profetas ante vos ia es persegui en esta modo ance.

Regulas Nova

13 Vos es la sal de la tera, ma si la sal ia perde se gusta, con ce el es donada sal? De esta ora, el es bon per no cosa, ma eser refusa e craseda su la pedes.

14 Vos es la lus de la mundo. Un site ce es funda supra un colina no pote es ascondeda.

15 Persones no ensende un candela e pone el su un panier, ma supra un portacandela, per ce el dona lus a tota ci es en la casa.

16 Lasa vos lus lumina a persones, per ce los ta vide vos bon operas, e vos glori vos Padre ci es en sielo.

17 No pensa ce me veni per destrui la lege de la profetas. Me no veni per destrui ma per reali.

18 Per ce me disa vera a vos: Asta la siela e la tera desaperi, no un punta e no un vergula va desaperi de la lege asta tota es realida.

19 Donce, alga un ci va desobe la min de esta comandas e va instrui otras ance en esta modo, el va es clamada la min en la renia de sielo; ma alga un ci va obe e instui esta comandas, el va es clamada grande en la renia de sielo.

20 Per ce me dise a vos ce, sin ce vos reto es plu grande ce la reto de la scrivores e la fariseas, vera, vos va no entre la renia de sielo.

21 Vos ia oi los de antica dise: “Tu debe no mata,” e “Alga un ci mata es en peril de judi.”

22 Ma me dise a vos, alga un ci es coler a se frate sin causa va es en peril de judi; e alga un ci dise a se frate “pigra” va es en peril de la consilia; ma el ci disa “stupida” va es en peril de la focos de inferno.

23 Donce, si tu trae tu donadas a la altar e ala recorda ce tu frate ave un problem con tu,

24 Lasa tu donada ante la altar e vade a tu via. Prima, es reconselada con tu frate e alora veni e dona tu donada.

25 Acorda pronto con tu enemi durante tu es a la via con el, sin ce a alga ora la enemi trae tu a la judor, e la judor trae tu a la polis, e tu es poneda en la prison.

26 Me dise vera a tu, tu va veni de ala per no modo asta la ora tu paia la sentime final.

27 Vos ia oi los de antica dise: “Tu debe no adultera.”

28 Ma me dise a vos, alga un ci regarda un fema con libido ia adultera ja en se cor.

29 E si tu oio destra fala tu, estrae el e lansa el de tu; per ce tu profita plu si un de tu membros mori, ce tu corpo completa es lansa en enferno.

30 E si tu mano destra fala tu, corti el e lansa el de tu; per ce tu profita plu si un de tu membros mori, ce tu corpo completa es lansa en enferno.

31 Es diseda: “Alga un ci pone se sposa a un lado, el debe dona a el un contrata de divorsa.”

32 Ma me dise a vos, alga un ci pone se sposa a un lado, eseta per nonfidelia, causa el adultera; e alga un ci va sposi el ci es divorsada adultera ance.

33 Ancora, tu ia oi los de antica dise: “Tu debe no jura, ma performa tu juras a la Senior.”

34 Me me dise a vos, no jura en tota casos, no a sielo, per ce el es la trono de Dio;

35 No a la tera, per ce el es Se reposepedes; no a Jerusalem, per ce el es la site de la Re grande.

36 E tu debe no jura a tu testa, per ce tu no pote cambia un capela blanca o negra.

37 Ma dise “si, si” o “no, no;” per ce alga cosa plu ce estas veni de malia.

38 E vos ia oi la dise, “Un oio per un oio, e un dente per un dente.”

39 Ma me dise a vos: No resista malia, ma si un person colpa tu a tu jena destra, presenta la otra jena ance a el.

40 E si un person suplica tu en la lege e retira tu jaca, dona a el tu capa ance.

41 E si un person forsa ce tu vade un milia, vade du milia con el.

42 Dona a el ci demanda de tu, e no evita el ci vole presta de tu.

43 Vos ia oi la dise: “Tu debe ama tu visina e odi tu enemi.”

44 Ma me dise a vos, ama tu enemis, bondise los ci maldise tu, fa bon a los ci odi tu, e prea per los ci usa tu con odia e persegui tu,

45 Per ce vos pote es la enfantes de vos Padre ci es en sielo. Per ce El causa la sol brilia supra la mal e la bon, e El envia la pluva supra la justa e la nonjusta.

46 Per ce, si vos ama los ci ama vos, tu gania ce? La coliores de impostas fa la mesma, no?

47 E si tu saluta sola tu frates, tu fa ce plu ce otras? La coliores de impostas fa la mesma, no?

48 Donce, tu debe es perfeta, mesma como tu Padre ci es in sielo es perfeta.

Mateo 6

1 Es atendente ce vos no mostra carita ante otra persones per es videda par los; a otra ves vos no va reseta tu recompensa de vos Padre ce es in sielo.

2 Donce, cuando tu mostra carita, no sona un trompeta ante tu, como la ipocrites en la sinagoga e en la ruas per reseta la gloria de umanas. Vera me dise a vos, los va ave se recompensa.

3 Ma cuanto tu mostra carita, no permite tu mano sinistra sabe ce tu mano destra fa,

4 Per tu carita ta es en secreta; e tu Padre ci vide en secreta, El va recompensa tu en abria.

5 E cuando tu prea, no es como la ipocrites. Los gusta prea stante en la sinagogas e a la cantos de la ruas, per es videda par persones. Vera me dise a vos, los ave se recompensa.

6 Ma cuando tu prea, entra tu saleta e, cuando tu ia clui la porta, prea a tu Padre ci es en secreta; e tu Padre ci vide tu en secreta va recompensa tu en abria.

7 Ma cuando tu prea, no usa repetas vanos como la paganes, per ce los pensa ce los es oida cuando los parla multe.

8 Donce no es como los, per ce tu Padre sabe ce cosas tu nesesa ante tu demanda de El.

La Prea de la Senior

9 En esta modo prea: Nos Padre, ci es en sielo, santa es tu nom.

10 Tu renia veni. Tu vole es fada, en tera como en sielo.

11 Dona oji nos pane dial.

12 Pardona nos detas, como nos pardona nos detores.

13 E no condui nos a tentia, ma proteje nos de malia. Per ce de tu es la renia, e la potia, e la gloria per tota tempo. Amen.

14 Per ce si vos pardona umanes se ofendes, vos Padre en sielo va pardona vos ance.

15 Ma si vos no pardona umanes se ofendes, vos Padre no va pardona vos.

16 Plu, cuando tu juna, no dona un fas triste, como la ipocritas. Per ce los malforma se fases per aperi juna a umanes. Vera me dise a tu, los ave se recompensa.

17 Ma tu, cuando tu juna, pone unguento a tu testa e lava tu fas,

18 Per ce tu no nesesa aperi juna a persones, ma a tu Padre en secreta; e tu Padre, ci vide en secreta, va recompensa tu en abria.

De Ricia

19 No reserva tesoros per vos mesmas en la tera, do la papilios de note e la osida ruina, e do la furores entra e fura;

20 Ma reserva tresoros per vos mesmas en sielo, do no papilios de note e no osida ruina, e do la furores no entra no fura.

21 Per ce do vos tesoro es, do es vos cor ance.

22 La lus de la corpo es la oio. Donce, si tu oio es bon, tu tota corpo va es plen de lus.

23 Ma si tu oio es mal, tu tota corpo va es plen de oscuria. Donce, si la lus ce es en tu es oscura, ce grande es esta oscuria!

24 No person pote servi du mestres; per ce el va odi la un e ama la otra, o el va teni la un e despresa la otra. Vos no pote servi ambos Dio e Mamon (ricia).

25 Donce me dise a vos, no pensa de vos vive, de ce tu va come o ce tu va beve, no ance de tu corpo, ce tu va porta. Esce la viva no es plu ce carne, e la corpo no es plu ce vestes?

26 Vide la avias de la aira: los no seme e no recolie; e ance tu Padre en sielo nuri los. Esce vos no plu bon ce los?

27 Ci de vos, par pensa, pote junta un codo de longia a vos altia?

28 E per ce vos pensa de vestas? Considera la liles de la campo, como los crese. Los no labora e no tese,

29 Ma vera me dise a tu ce no ance Solomon en tota se gloria ia es vestida como un de los.

30 Donce, si Dio en esta modo vesti la erba de la campo, ce es oji asi e es lansada doman en la forno, esce El no vesti vos multe plu, vos de poca fidel?

31 Donce no pensa “Ce nos va come?” o “Ce nos va beve?” o “Ce nos va porta?”

32 (La paganes xerca per tota esta cosas.) Tu padre en sielo sabe ce vos nesesa tota esta cosas.

33 Ma xerca prima la renia de Dio e Se retia, e tota esta cosas va es donada a vos.

34 No pensa de doman, per ce doman va pensa de se mesma. Basta per alga dia es la malia de la dia.

Mateo 7

La Avisas

1 No judi, per ce vos no va es judida.

2 Per ce la judia ce vos dona es la judia per ce vos va es judida; e la mesura tu usa va es la mesura per ce vos va es mesurada.

3 Per ce tu regarda la particula en la oio de tu frate, ma no considera la faxon en tu oio propre?

4 Como tu pote dise a tu frate “Permite me estrae la particula de tu oio” cuando tu ave un faxon en tu oio propre?

5 Ipocrita! Prima estrae la faxon de tu oio propre, e donce tu vide clar per estrae la particula de la oio de tu frate.

6 Vos debe no dona la santa a canes, e no lansa vos perlas ante porcos, per ce los no crase los su pedes e donce retorna e lasera tu.

7 Demanda, e esa va es donada a vos; xerca, e vos va trova; toca, e la porta va es abrida per vos.

8 Per cada un ci demanda va reseta; e el ci xerca va trova; e el ci toca, la porta va es abrida per el.

9 Ci person entre vos, si se fio demanda pan, va dona un petra a el?

10 O si el demanda un pex, va dona un serpente a el?

11 Donce, si vos, ci es mal, sabe como dona bon donadas a tu enfantes, como plu tu Padre en sielo va dona bon cosas a el ci demanda de El?

12 Donce, tota cosas vos desira ce persones fa a vos, vos fa ance a los; per ce esta es la lege e la profetas.

13 Entra en a la porta streta, per ce la porta larga e la via grande vade a destrui, e multe entra ala.

14 Streta es la porta e la via ce vade a vive, e poca trova el.

15 Es cauta de profetas falsa, ci veni a vos en la vestes de oveas, ma a la enterior es lupos famos.

16 Vos va reconose los par los frutas. Esce persones colie uvas de spinas o figas de cardos?

17 Ance, cada bon arbor dona bon fruta, ma un arbor malida dona mal fruta.

18 Un bon arbor no pote dona mal fruta, e un arbor malida no pote dona bon fruta.

19 Cada arbor ce no dona bon fruta es cortida e lansada en la foco.

20 Donce, vos conose los par los frutas.

21 No cada un ci dise a me “Senior, Senior” va entra la renia de sielo, esetante el ci fa la vole de me Padre en sielo.

22 Multe va dise a me en acel dia “Senior, Senior, esce nos no ia profeta en tu nom, e ia estrae demones en tu nom, e fa multe operas stonante en tu nom?”

23 E donce me va profesa a los “A no tempo me ia conosa vos; vade de me, vos ci fa nonjustia.”

24 Donce, cada un ci oi esta dises de me e fa los, me va compare el a un person saja, ci ia construi se casa supra un roca.

25 E la pluva cada, e la deluvia veni, e la venta sofla e colpa a esta casa, e la casa no cada, per ce el ia es funda supra un roca.

26 E cada un ci oi esta dises de me e no fa los va es comparada a un person fol, ci construi se casa supra la arena.

27 E la pluva cada, e la deluvia veni, e la venta sofla e colpa a esta casa, e la casa cada, e la cada ia es grande.

28 E final, cuando Jesus ia fini esta dises, la persones ia es stonada a Se dotrina;

29 Per ce El instrui los como un con autoria, e no como la scrivores.