Sufrases

From LFN

Un sufrase es un frase peti ce partisipa en un otra frase plu grande (la contenador).

Contenida 1 Introdui 1.1 Locas de sufrases 1.2 Spesies de sufrases 2 Ce, ci, cual 2.1 Ce 2.2 Ci 2.3 Cual 2.4 Sufrases e pronomes de relata 2.5 Preposadas con "ce" e "ci" 3 Cuando, do, como, cuanto 3.1 Cuando 3.2 Do 3.3 Como 3.4 Cuanto 3.5 Juntas o averbos de relata? 3.6 Con preposadas 4 Otra juntas

Introdui

Locas de sufrases

Multe frecuente, un sufrase situa a fini de se contenador:

• Me pensa ce la vive es bon.
• Tu demanda cuando nos va come.
• El es un om ci me no conose.
• Nos pote aida si tu desira.
• Los come la ceso car los es fama.

Un sufrase pote situa ance a comensa:

• Ce la vive es bon es un filosofia felis.
• Cuando nos ariva, me va dormi.
• Si la parola es en la disionario, el es bon.

O el pote situa a media de la contenador:

• La pensa ce la vive es bon es felisinte.
• Un fema ci me no conose sta a la porta.

Un sufrase pote conteni un otra:

• Me espera ce la fema ci sta a la porta crede ce la vive es bon.

Spesies de sufrases

On pote clasi un sufrase par el rol en la contenador:

• El pote jua la rol de un nom. Me pensa ce la vive es bon. "Ce la vive es bon" es la cosa ce me pensa.

• El pote jua la rol de un ajetivo. El es un om ci me no conose. "Ci me no conose" descrive la om. Esta spesie es nomada un sufrase de relata.

• El pote jua la rol de un averbo. Nos pote aida si tu desira.

Ce, ci, cual

Ce

Multe sufrases comensa par la parola "ce" (o par un espresa conteninte el, como "contra ce").

"Ce" ave sinco usas diferente:

• Pronom de demanda per cosas: Ce es en la caxa? Me demanda a tu ce es en la caxa. (sufrase como nom)

• Pronom de relata per cosas: Me toca la animal misterios ce dormi en la caxa. (sufrase como ajetivo)

• Junta, sin sensa spesial: Me espera ce la animal dormi. (sufrase como nom)
  • Como caso spesial, pos un ajetivo o averbo usada con "tan", la sufrase con "ce" indica la state resultante: El es tan peti ce me no pote el vide.

• Junta de compare: La animal es plu bela ce me ia imajina. (sufrase como averbo)

• Preposada de compare: Tu es plu alta ce mi.

Ci

"Ci" ave du usas:

• Pronom de demanda per persones: Ci es tu? Tu no dise a me ci tu es. (sufrase como nom)

• Pronom de relata per persones: La enfante ci cade no es ferida. (sufrase como ajetivo)

Cual

"Cual" ave sola un sensa, ma du usas gramatical:

• Ajetivo de demanda per elejes: Cual libro tu leje? Me no sabe cual libro tu leje. (sufrase como nom)

• Pronom de demanda per elejes: Cual de esta libros parteni a tu? Me oblida cual parteni a tu. (sufrase como nom)

Sufrases e pronomes de relata

Un sufrase de relata descrive alga cosa en la contenador. La pronom de relata representa acel cosa en la sufrase.

La pronom de relata es "ce" per cosas e "ci" per persones.

El pote es la sujeto de la sufrase:

• Me gusta la libro ce tu ia scrive.
• Me no conose la om ci leje la libro.

El pote es la ojeto de la sufrase:

• Me regarda la libro ce la om leje.
• La fema ci me regarda es blonde.

El pote es la ojeto de un preposada en la sufrase:

• La caxa en ce la animal dormi no es grande.
• La om a ci me presta me auto ia es un furor.

Un sufrase de relata descrive alga cosa en la contenador. La descrive pote es esensal o nonesensal. Jeneral, nos pone virgulas sirca un sufrase de relata nonesensal:

• Esensal: La serpente ce es en la caxa es demente. (La sufrase identifia un serpente. Posable un otra serpente es en la situa, ma no en la caxa.)
• Nonesensal: La serpente, ce es en la caxa, es demente. (Nos conose ja la serpente. La informa ce el es en la caxa es interesante ma no multe importante.)

Un pronom de relata pote relata a un otra pronom en la contenador:

• El ci osa va gania.
• Me ave tro libros: me va dona a tu los ce me no nesesa.

Un pronom de relata pote relata a la tota frase presedente, ma frecuente plu clar es usar un pronom de mostra, como "esta" o "acel":

• Me ia gania la loto, ce es multe plasente.
• (Me ia gania la loto, ce es un spesie de jua.)
• Me ia gania la loto, e acel es multe plasente.

Preposadas con "ce" e "ci"

Car "ce" e "ci" pote es pronomes, nos pote usa los como ojetos de preposadas.

Pronomes de demanda:

• Per ce tu dise acel? Me no comprende per ce tu dise acel.
• A ci me debe dona la clave? El no sabe a ci el debe dona la clave.
• La table es fada de ce? Tu demanda de ce la table es fada.
• La table es fada par ci? Me informa a tu par ci la table es fada.

Pronomes de relata:

• La can a ce me dona me mano atenta come el.
• La person per ci tu ia vota es stupida.

Cuando, do, como, cuanto

Cuando

"Cuando" ave tre usas diferente:

• Averbo de demanda per tempo: Cuando nos va come? La enfante demanda cuando nos va come. (sufrase como nom)

• Averbo de relata per tempo: En la anio cuando me nase la clima es multe calda. (sufrase como ajetivo: el descrive la anio)

• Junta per tempo: Me va dormi cuando nos ariva. (sufrase como averbo)

Do

"Do" ave tre usas, esata como "cuando":

• Averbo de demanda per loca: Do es la can? Me no sabe do es la can. (sufrase como nom)

• Averbo de relata per loca: En la pais do me nase la clima es multe calda. (sufrase como ajetivo: el descrive la pais)

• Junta per loca: Me va dormi do me sta. (sufrase como averbo)

Como

"Como" ave cuatro usas:

• Averbo de demanda per modo: Como tu conose me nom? Me no comprende como tu conose me nom. (sufrase como nom)

• Averbo de relata per modo: La manera como tu pronunsia acel parola es riable. (sufrase como ajetivo: el descrive la manera)

• Junta per modo: Me parla como me pensa. (sufrase como averbo)

• Preposada de modo: Acel om pare como un agila.

Cuanto

Cuanto ave tre sensas, e la prima ave du usas gramatical:

• Ajetivo de demanda per cuantia: Cuanto acua es en la balde? Me no desira sabe cuanto serpentes es en la caxa. (sufrase de nom)

• Averbo de demanda per cuantia: Cuanto va veni? La botecor ia dise cuanto costa la orolojo. (sufrase de nom)

• Averbo de relata per cuantia: Tu pote dormi a la grado cuanto tu desira. (sufrase como ajetivo: el descrive la grado)

• Junta per cuantia: Tu pote dormi cuanto tu desira. (sufrase como averbo)

Juntas o averbos de relata?

"Cuando", "do", "como" e "cuanto" es usada como juntas. Ma on pote esplica acel como caso spesial de los usas como averbos de relata, si on ajunta imajinal un parola mancada:

• Me va dormi cuando nos ariva. = Me va dormi alora cuando nos ariva. La sufrase descrive "alora".

• Me va dormi do me sta. = Me va dormi ala do me sta. La sufrase descrive "ala".

• Me parla como me pensa. = Me parla a acel modo como me pensa. La sufrase descrive "modo".

• Tu pote dormi cuanto tu desira. = Tu pote dormi a la grado cuanto tu desira. La sufrase descrive "grado".

Con preposadas

Car "cuando", "do", "como" e "cuanto" pote introdui un sufrase ce jua la rol de un nom, nos pote usa acel sufrase como ojeto de preposada.

Cuando:

• Nos va dansa pos cuando nos canta. Nos va canta a comensa, e pos la canta nos va dansa.
• Nos va canta ante cuando nos dansa. La mesma.
• Nos va dansa asta cuando nos adormi. Cuando nos adormi, nos dansa va para.
• Me pensa en cuando me dormi. Me pensa en me dormi.
• Me abita asi de cuando me nase. Me ia abita sempre asi.

Do:

• Me vade a do tu es.
• Me veni de do tu es.
• La polis ia desinia un sircula sirca do el trova la clave.

Como:

• Tu descrive difere multe de como la loca pare en realia.

Cuanto:

• Me va paia tu contra cuanto oras tu labora.

A esta casos, la preposada governa la tota sufrase. Acel difere multe de la condui de un preposada con un pronom de relata, do la preposada governa sola la pronom:

• Nos va fa un dansa pos cuando nos canta. Nos va canta a comensa, e pos la canta nos va dansa.
• Nos va fa un dansa pos ce nos va canta. Nos va dansa a comensa, e pos la dansa nos va canta.

Otra juntas

Otra juntas pote introdui sufrases con sinifias spesial.

"Afin" introdui un sufrase ce mostra un resulta intendeda. La preposada corespondente es "per". ("Per ce" es un espresa de demanda, o el introdui un sufrase de relata.)

• El veni a la fenetra afin nos pote parla a el. (sufrase como averbo)
• Me vade a la fenetra per regarda la vista.

"Car" introdui un sufrase ce mostra un causa o un motiva o un razona. La preposada corespondente es "a causa de".

• El clui la fenetra car el no gusta la ruido de trafica. (sufrase como averbo)
• El clui la fenetra a causa de la ruido.

"Si" introdui un sufrase ce mostra un state o caso de ce la contenador depende. Cuando un sufrase con "si" sta a la comensa de se contenador, on pote ajunta "donce" pos la sufrase per asentua la depende.

• Me va sta en me casa si pluve forte. (sufrase como averbo)
• Si tu crede ce la mundo es plata, donce tu es multe strana. (sufrase como averbo)

"Si" es ance usada per introdui un demanda nondireta, de ce la responde es "si" o "no". El es simil a "ce", cuando "ce" es un junta sin sinifia spesial: "ce" es per fatos; "si" es per demandas.

• Me demanda a me si la pluve va para. (sufrase como nom)